*فلک سن دین*

فلک سن دین منیمیندن بیر دانیش 
دئ پس گؤرم آغیر ائللر نیجولدو
سسلنمز بولبوللار،  قومرولار خامیش 
فلک منیم اهل ئ حاللار نیجولدو
💮 💮 💮 💮 💮 
فلک ناحق دولاندیردینگ باشیمی 
فلک آتدینگ ائلدن ایراق داشیمی 
گلدی دوتدو سئیلاب غم ئ دؤشومو 
هئچ بیلمدیم شوخ گؤزللر نیجولدو
💮 💮 💮 💮 💮 
هر عاریف سؤیله سه حق سؤزو تقصیر 
بیلیر تقدیر نه چارا سئیر نه تدبیر
گلدی ناحاق بیر آفت ئ عالمگیر 
سؤیله گؤرم قیزیل گوللار نیجولدو
💮 💮 💮 💮 💮 
فلک ائل اوغلوندان چکمیشنگ دامار 
قاشقایی ائلینی ائتدینگ تار و مار 
قوجاسی خوار، جاهاللاری خوار و زار
ّگول ایزینده گوللو خاللار نیجولدو 
💮 💮 💮 💮 💮 
بخت وئرمه سه اولور عالمه آشکار 
فلک سن گه ورتدینگ نئچچه نابکار 
آقاجینگ اؤز قوردو اؤزونو آتار 
آقاج دوشدو برگ و باللار نیجولدو
💮 💮 💮 💮 💮
داغیلدی دستگاهلار ایغیلدی دستگاه 
نولدو شووکت، نولدو میکنت، نولدو جاه؟ 
بیلمدیم نیجولدو صوولت و سپاه
خوب سردارلار، آچیق یوللار نیجولدو
💮 💮 💮 💮 💮 
سرا خالی سردارلاری ایتن ائل 
فلک اوز قهریندن داشین آتان ائل 
تفرقه سراسیز یاسا باتان ائل 
فلک دئ پس خوش گؤنگوللر نیجولدو
💮 💮 💮 💮 💮 
فلک ایشینگ وئردیگیمیش آلدیردیک
گاه آغلاتدیک گاه بیرینی گولدوردوک 
بو *بیلمزی* هر نغمه یه چالدیردیک
دئ شوم فلک خوب رواللار نیجولدو
💮 💮 💮 💮 💮 
*قوشماچی:غلام رستمی (بیلمز)*
*یازان:شهرام بدری قشقایی*

 

 

با تشکر از جناب آقای غلام رستمی شاعر ارزشمند قشقایی