ازیز کاکام نامی دیر
شامی نامی غلامی دیر
چوخ خوش گلدینگ
بو اُوبایا
بیل نامی بیزه حامی دیر

« شامی»

*****************

کیهانه ایمانی یازان ائلداشیم
یاغمورلی سئللرده اۆزن ائلداشێم
یاسوْجده سێسخده گزَن ائلداشێم
قۆلاغینگ ائشئدێر گؤزلرێنگ گؤرێر
هئل مئخَگ اێسێنێ سؤزلرینگ وئرێر

« شامی»
۲۸ / ۷ / ۱۴۰۲

***************************************

بو یانان گؤینومونگ چوخ آرزو واری
یارادان یارادی دؤشینگده ناری
عشقینگدن ائرییه ر داغلارینگ قاری
قوی گؤزل باخماگینگ آلا جانیمی

بیر رخصت وئر منه سنبیلنگ تاری
ملاقات ائیله یگ بیر گئجه یاری
اُوخ ووردینگ جانیما دردیم دیر کاری
قوی گؤزَل باخماگینگ آلا جانیمی

اُوشئلار هئیکلینگ دشتستان موخو
اُو بورمه ساچلارینگ داغ قوچی شاخی
اُو کمان قاشلارینگ أبریشم نَخی
قوی گؤزل باخماگینگ آلا جانیمی

اُو نازوک دوداغینگ تَر لوممورلرینگ
قولباغی باغلایان شئلار قوللارینگ
ایپگه بنگزه یر قره تئللرینگ
قوی گؤزل باخماگینگ آلا جانیمی

اوجه بُویونگ سروه نازه بنگزه یَر
اۆزۆن بُوینوگ قیزیل غازا بَنگزه ییر

شوخ جمالینگ گوللی یازا بَنگزه ییر
قُوی گؤزل باخماگینگ آلا جانیمی

شامی عۆمْوری سنی گیدن باش ائتدی
اؤز گؤینونی خیالیدن خُوش ائتدی
گلدی اَجَل تیری اُونا توش ائتدی
قوی گؤزل باخماگینگ آلا جانیمی

« شامی»
۱ / ۸ / ۱۴۰۲

*********************

من مُسافر، سَنده تک ، یئرینگ خالی
دانیشایدینگ قولاق وئرم سؤزونگه

ساتاشا گؤزلرینگ آلانگ احوالی
آچایدیم زولفلارینگ باخام او٘زونگه

گؤزل حالیم داییم قالماقاللا دیر
یای و فاییز گئدمیش ایندی چیلله دیر
شرین دانیشدیگینگ شرین دیلده دیر
حق‌دیر قوربان اُولام گوللی یازینگه

ساوه‌نیگ ناری دیر تَرلیمولَرینگ
إرَم باغچاسی دیر قشنگ گو٘للرینگ
خینادان بُویانمیش ساری تئللرینگ
ناز ائیله‌سَنگ تصددقم نازینگه

بهشته رضوانیگ قونچا گوللری
ظلمتدَن ظولمت‌دیر اینچه تئللری
آغ صورتینگ بنفشه‌دیر خاللری
دَنیز گؤلده دان آتارام غازینگه

(یُول گئدنده تَر لیمولَر تَرپه نیر)
آج اُولاندا دووار قاشدان سَرپه نیر
لؤک مَس اُولسا رقیب گؤره چیرپی نیر
اوسسا سَن چال،باش اه یه رَم سازینگه

شامی دئر دیشیدی بونازو قمزه
انشریق گونویدی چالمیشدی بیزه
اُو خَزان فاییزیم دؤنمیشدی یازه
سؤرمه اُولایدیم چکیلَم گؤزونگه

« شامی»
۹/ ۹/ ۱۴۰۲

☆☆☆☆☆☆☆☆☆☆☆☆

بویو موزون گؤزلری گؤی سه‌ودیگیم
من سئردیم اَل وئره یان وئردی گئتدی
ساچی اوزون سؤزلری گَه‌ی سه ودیگیم
من سئردیم اَل وئره یان وئردی گئتدی

بُورخینالی تئلی افشان سه‌ودیگیم
زیبا اندام دیشی مرجان سه‌و‌دیگیم
منی ائیله یَن سُوهره جان سه ودیگیم
من سئردیم ال وئره ،یان ویردی گئتدی

طوطی دیللی طاوس تئللی سه ودیگیم
یئلاقی گؤی چای گوللی سه‌ودیگیم
بئلی اینچه قولاج قوللی سه ودیگیم
من سئردیم اَل وئره یان وئردی گئتدی

داغلاردان یوخاری هوالی تَرلان
هجرانیگ دردیندن گؤزلریم گریان
سَنیگ ایچی منم، وایالی بیریان
من سئردیم ال وئره یان وئردی گئتدی

شامی یام عومرومی ائیله دینگ تباه
ظلم ائدینگ باخمادینگ ائیله دینگ گوناه
یارادان تاری یا آپاردام. پناه
من سئردیم اَل وئرم یان وئردینگ گئدینگ

« شامی»
1402/09/02