شعر زیبای قشقایی به مناسبت نیمه شعبان از شاعرگرانقدر قشقایی جناب آقای بهرام احمدی

«جومعه آغشامی»

جومعه آغشامی داریخ زامان دیر 
گئج گلیر تئز گچیر، غم  قالان دور

گؤزله ین لر گؤزو،دا یوْرولموش
دردلری چوْخ یامان چوْخ یامان دیر

فاطمه یوسفی هاردایاینگ سن؟
سن ده کی منزلینگ  بی نشان دیر

گل بو فاییزلاری یازا دؤندور
باغیمیز یازی دا ، قیش خزان دیر

ایندی بیر کوچه و کربلادیر   
گؤزلری یوْللارا ساخلادان دیر

آیریلیقدا یانان کؤیللره باخ
آیریلیق اوْد تکین یاندیران دیر

گل داها انتظار یوْردو بیزی
گل کی آخرزمان بو زمان دیر

یاز یانار یازغی دا گؤزو یوْلدا
گؤی بولوت دور آما گۆن چالان دیر

بهرام احمدی

امام زمان(عج) گۆنو موناسبتینه

 

شعر زیبای قشقایی در مورد عید مبعث از شاعر گرانقدر قشقایی جناب آقای بهرام احمدی

«محمّد(ص)»

آیی باتیردی جمالینگ محمّد(ص)
سروی اه یدی  اعتدالینگ محمّد(ص)

قیریلدی فلک  قدری و قییمتی
گؤرنده قدر و کمالینگ محمّد(ص)

هر کیم گؤروشو وعده سی قییامت 
لیلة الاسری وصالینگ محمّد(ص)

آدم،نوح،خلیل،موسا و عیسا ده
یوْللاری سنینگ ظلالینگ محمّد(ص)

دونیا همّتینگ مجالی اوْلمازکی
قییامت گؤرور مجالینگ محمّد(ص)

بزه تمیش جنّت اؤزونو اۆمودلو
بگنه اوْنو بلالینگ محمّد(ص)

دۆشمگه یئر تک  تلسیر آسیمان
تا اؤپه سنینگ نِعالینگ محمّد(ص)

آی و گۆنش یوْخ چالا محشر گۆنو
اوْ گۆن ایشّیغی جمالینگ محمّد(ص)

یاراشیر آی و گۆن ایشّیقلاتمایا
قارشی گؤرنده هلالینگ محمّد(ص)

سعدی دئدیگی آشیقلیق ایسته سم
یئتر بو عشق سن و آلینگ محمّد(ص)

بهرام احمدی

(چئویرمه سعدی شعریندن(ماه فروماند از جمال محمد))

شعر زیبای قشقایی بنام «آنالالا لالا آنا »از شاعر ارزشمند قشقایی جناب آقای بهرام احمدی

«آنا لالا لالا آنا»

داریخمیشم اللرینگی
باشیم سالیر یوْلا آنا
باشیم چالیر کندیمیزی
گلم گۆله گۆله آنا

نه اوزاق دور یولونگ سنینگ
داغ دیر ساغ و سوْلونگ سنینگ
یوخاریدا الینگ سنینگ
منی گتیر دیله آنا

نمچیله ییر بولوت گؤزونگ
گئجه لری سوْیوق یازینگ
شبنم لنیر چیچک اۆزونگ
گۆل قوْیما گۆل سوْلا آنا

سندن آیری کیم باشیمی...؟
کیم  باغچامی کیم قوشومو...؟
سن آغلاسانگ کیم یاشیمی...؟
گۆله گۆله سیله آنا

آنا دردینگ آلمالی دیر
دردینگ باغ دیر آلمالی دیر
درد دن اۆرگ دوْلمالی دیر
کیم دردینگی آلا آنا؟

قوْی من دردینگ آلام آنا
آتام آنا بالام آنا
دیلیم آنا ائلیم آنا
آنا لالا لالا آنا

آخئی لالالالا آنا...

آنا گۆنو مناسبتینه اوْغرارکن

بهرام احمدی
۱۳۹۹/۱۱/۱۵

شعر زیبای قشقایی از شاعر گرانقدر جناب آقای بهرام احمدی(یانار)

💟💟💟💟💟💟💟
«قشقایی ادبیاتێ»

قشقایی شعرێ گل گؤر
اۆجلمگه آن-د وئرمیش
تورک شعرێ باغچاسێنا
قوْشما قوْشما دان وئرمیش

قایێرێلمیش دوْولتێ
بخشی اوْلموش صولتێ
شامی نینگ اصالتێ
بیر عارف یانان وئرمیش

قدمێ خوْش یئریشیر
بیلمز بیلیر دانیشیر
شیروانی آزآز جوْشیر
قشلاقی آرمان وئرمیش

رجایی شهریارێ
جهانگیرێ دا وارێ
نامی اینان غنی لارێ
کامبیز و ساسان وئرمیش

باخ لشکر و مئیدانی
منصور انوشیروانێ
گردێ کیم دیر؟ مردانێ
نادرێ مئیدان وئرمیش

کاوه وارێ کشورێ
فریدونێ اژدرێ
ائشیدّیم بهمنیارێ
یوردونا بنیان وئرمیش

آیدین اوْلموش مرادێ
خرّم اوْلسون بلادێ
مأذون خئیر اوْلسون یادێ
کێ نئچّه احسان وئرمیش

باغێنا آواز دؤنموش
ساغلیغا نوْروز دؤنموش
مسلم تکین یاز دؤنموش
گۆللرینه جان وئرمیش

هربیرینینگ قلمێ
بیر اؤلکه نینگ علمێ
یورد کؤچنده کلامێ
عزیز ارسلان وئرمیش

بهرام_احمدی
💟💟💟💟💟💟💟

شعر قشقایی در مورد شهادت حضرت فاطمه سلام الله علیها از شاعر گرانقدر قشقایی جناب آقای بهرام احمدی

«آسێمان»

آسێمان یان قاپینگ یی آچ میخینی دؤی یانینگا
قێرێل ایچ دن سسله نن قوْپ یئری، یئر قوْی قانایا

🖤🖤🖤

بو یئر اۆستۆنده نه لر گلدێ پیمبر باشونا
یاسا بات گؤی قره گئیدیر اوْ یاشیل گؤی جانینگا

🖤🖤🖤

کێ گؤروکدێ گؤزونه بیر کۆچه دن  مین کۆچه درد
کۆچه دن باشلایێش اوْلدو غمێمیز های دونییا

🖤🖤🖤

اوْت آتان ظالم الینگ نن  قاپێ قێردێ یانێنێ
آسێمان سسێمێ سپ ظولمێ بشر قوْی تانییا

🖤🖤🖤

قوْپ جهنّم کێ گؤره م امّ ابیها  وورانێ
نیجه قییدێ ال آپاردێ اوخارێ وای آنایا؟

🖤🖤🖤

سایغی سیزلیگ گۆنۆ دوْغدونگ آسێمان
اوْ کۆچه ده
بویودو کربلایانچز  بئیه وار تای گۆنینگا؟!

بهرام احمدی۹۹/۱۰/۲۷

شهادت حضرت زهرا(س) ایچی

شعر زیبای قشقایی ازشاعرگرانقدر قشقایی جاب آقای بهرام احمدی

«تیفان»

منی بوردان اوزاغا
قوپ آی تیفان قاز آپار
شعریمی بیر یارپاغا 
یاشلاریمنان یاز آپار

🌸🌸

سن آتدینگ بورا منی
گئنگلیگدن دارا منی 
ایندی دؤن آرا منی
بوکول ائتمه ناز آپار

🌸🌸

سن بو ساری یارپاغی
سن بو چیچک سیز باغی
تیفان سن توز تورپاغی
قیش گتیردینگ یاز آپار

🌸🌸

غریب سه یرم بوردا من
چوخ غم یئیرم بوردا من
شعره دئیرم بوردا من
غملری آز آز آپار

🌸🌸

گؤریرم اینسانلاری
«یانار» باغری قانلاری
تیفان قره گؤنلری
داش اوستونه قاز آپار 

بهرام احمدی«یانار»
۹۹/۱۰/۱۱