شعر زیبای قشقایی در مورد زبان مادری بنام (دیل دؤگۆشۆ ) از استاد عوض الله صفری
📰منبع : *نشریه الکترونیکی ایلدیریم⚡*
💎 شماره پیاپی : ۱۰
📅 شنبه ۲ اسفند ۹۹
🌐 ویژه‌نامه به مناسبت روز ۲۱ فوریه ۲۰۲۱ ، روز جهانی زبان مادری
📝 شعر *دیل دؤگۆشۆ*¹
🖋️ عوض‌اله صفری کشکولی
___________________________________
بیر جانلێ میلتم اؤزدش² دیلیم وار
آیریقسێ بیر آغاج آیرێ گۆلۆم وار
کیمسه کی دیل وارێ هر نه سر وارێ
اولوس‌لار³ ایچینده اۆجه یئر وارێ
دیلی کی بئسلدنگ شیرین دانێشانگ
دۆشمنی دؤشۆنده دورانگ چالێشانگ
من تۆرکم دیلیم دیر یوْلوم آرمانێم
وارلێغێم ، دیرلیگیم ، کیملیگیم⁴ شانێم⁵
سه‌یسان ایل دیلیم‌دن یوْخدور خبریم
اوْلموش‌دور قانلێ یاش گؤزده ثمریم
آما سن یوْسانما⁶ ، یولداش آرخاداش
من تۆرکم یئنیلمز⁷ تۆرکۆنن آداش
قشقایێ سان کی بیر گؤمۆش⁸ آینادێر
محبت بولاغێ دؤشده قاینادێر
تا آینا بۆتۆن‌دۆر بیر آسلان گؤرور
سیندیرمه ، سیندیرسنگ مینگ شئر بغیریر
من تۆرکم اؤز دیلیم افتخارێم‌دێر
بیر اه‌ورن⁹ ائنیچز¹⁰ ناز دیل وارێم‌دێر
کیم دئمیش قشقایێ دیل محتاجێ‌دێر
آسلانێنگ¹¹ قویروغو تیلکی تاجێ‌دێر
۱- دیل دؤگۆشۆ : _نبرد زبان_
۲- اؤزدش : _خاص ، مستقل_
۳ - اولوس : _ملت_
۴- کیملیک : _هویت_
۵- شان : _رتبه ، مقام_
۶- یوْسانما : _به ستوه نیا_
۷- یئنیلمز : _اسیر نمی‌شود_
۸- گؤموش : _نقره_
۹- اه‌ورن : _دنیا_
۱۰- ائنیچز : _به پهنا_
۱۱- آسلان : _شیر_
استفاده از اشعار ونوشته های نویسندگان وشاعران با ذکر منبع ونام نویسنده وشاعر وکسب اجازه از ایشان مقدور است.