شعر و ادب پروینی دیر  بو پروین  
شیرین لیگینگ شیرینی دیر ،بو پروین 

قوشمالاری نصیحت دیر یاریسی 
حقیقت دیر ،گوزل دیگدیر واریسی 

گاهی دئیر  یانان شمعینگ حالیندان 
یا کی باغ و بستان ،بولبول دیلیندن 

گوزه لدیگه دئمیش خاتون شعرینی 
بیان ائتمیش  قامتینده ائزینی

علم و هنر  حورمتینی،ساخلامیش 
زر  قرشیسی  بو متاعی پایلامیش 

قربمچه دن یاد ائتمیشدیر  حسابی 
تقدیریندن آیری سه مز  زیادی 

"چنین گفتا ز یغمای جوانی "
اولماز بئله سعادت لر جاودانی 
 
 واری سسلیگ  نفس دیویندن بیلیردی
تن ملکیندن قرنگی یی سیریردی


بیر یاندان مست و هشیار حکایتی
حقیقتی آشکار ائتدیگ   غایتی

وئریر پندی ، بویوگ اول و صاحب دل 
جانا ائتیش، تندن آزاد اول و ول 

اوخو‌ پند اورگه دن شعری چوبانا
غافل کسی مذمت ائد قوی یانا 

نه هر دوواری اوتاران  چوباندیر
نه هر کس کی گوز واری پاسباندیر 

ستمکارلیگ اول قورد آیینی دیر
نه بیلسین قوززی نه ایمان ، دینی دیر  

اوجه لیگده قالا بیلمز هئچ خودخواه 
خوار اولور  یئری اولور هر گذرگاه 

یقین بیلدیم  اودور شعرینگ سلطانی
پروین اولموش منیم قوشمام مهمانی

 نئچه بیتی دئدیم ائدم اونو یاد 
او پرویندن که قوشمادا وار استاد 


بویوگ شاعر پروین اعتصامی دوغومو گونو موبارک 

#حسین_حیدری_کشکولی