elyanashamloo

*"انتظار"*

*واری کس دن یئی چکیرم*
*اؤزوم سنینگ انتظارینگ*
*گل گؤر نه خوب نقاش اولموش*
*هجران چکیر شاعر یارینگ*

*فروردین دن تا اسفنده*
*گئجه گوندوز فیکریم سنده*
*گل ایششیق سال بیزیم کنده*
*سن آللاهینگ سنی تارینگ*

*قراریدی سن بو جومه*
*آغ آتینان گلنگ قمه*
*سن گلمه دینگ باتدیم غمه*
*گل شاد اولا بو غمخوارینگ*

*جومه گونو پسین چاغی*
*دونیا اولموش غم بویاغی*
*ناقاد چکه هجران داغی*
*بو عاشقینگ بو خومارینگ*

*گل آقامیز اوزاق یولدن*
*نرگس چیخه ساغ و سؤلدن*
*دونیا باغی دوله گولدن*
*کؤلگه سالا گؤی چنارینگ*

*جومه شنبه فیکریم یاردا*
*حریف یوخوم انتظاردا*
*قوجالمیشام آه و زاردا*
*گل قوتارا آه و زارینگ*

*"صولت" توروب یول باشینا*
*باشین قویوب یئر دؤشونه*
*دالغا دوشوب گؤز یاشینا*
*بس کی چکیب انتظارینگ*

محمد رحیمی