*موبارک آی*

او٘زونگدن هرگئجه‌م گو٘ندوزدور ای آی
کاش اولا فرصتیم آیینگدا باقی
سؤزونگدن اؤرگیم اولدوزدور ای آی
سنگ حق یانیندان گو٘ل او٘زلو ساقی

بیر مبارک آیانگ قرآنینگ یازی
ائیله‌یه‌م آیینگدا راز و نیازی
آللاهیم بویوران اروج نمازی
سن منه قوناق و من حق قوناغی

عجب قدیرلی‌دیر قدرینگ گئجه سی
مینگ آیدان بللی دیر قدرینگ گئجه سی
هرحیثدن عالی دیر قدرینگ گئجه سی
رحمت گئجه سی دیر باشدان ایاغی

قدرینگ گئجه سینده رحم ائددی تاری
یاغدی رحمتینی مخلوقا ساری
پیغمبر قلبینه یاغیلدی واری
قرآن آیه لری حق یول چراغی

ابوحمزه اینن جوشن کبیر
اوخویام و گؤرَم اعمالی بیربیر
تاگلن ایلنچز یازیلا تقدیر
بصیرتدن گؤرَم هردم ایراغی

رحمت و مغفرت کؤلگه سالاندا
جهنّم درلری باغلی قالاندا
بهشت درلری ده آچیق اولاندا
گولر حق لطفیندان خلقینگ دوداغی

گلیر چاتار وقت حساب و کتاب
نکیرومنکر وسؤال و جواب
گؤنگول،تلاشینان داه ائیله ثواب
تاشیطان باغلیدیر اولموش دوسّاغی

شهریار سؤیله‌یر اؤرگیم جوشدو
سحردن افطارا حظ لریم داشدی
چوخ حیف اولور گؤرَم عمرونگ ساتاشدی
عید فطر گؤروندو آیری آی چاغی

شهریار خلیلی