*آنا دیلیم*


آنا دیلیم تورکو دیلیم ناز دیلیم
باشی اوجا یاشار دیلیم یاز دیلیم
کیملیگیمی دونیایا تانیشدیران
آییل دیلیم طیفانی یاتماز دیلیم

کؤک لی دیلیم ثمرلی آغاج دیلیم
گؤز ایشیقی ، باشیمیزا تاج دیلیم
یاشامیشانگ اؤزگه لر قرشیسینده
وئرمه میشنگ آیری دیله باج دیلیم

دادلی دیلیم سننگ بیزیم یولوموز
باشدان آیاق ساغومیزنگ سولوموز
یاشاییرانگ بالالارینگ دیلینده
دیلدن آتماگ باغلاسالار قولوموز

چوخ کیمسه لَر سئودی که سن اولمایانگ
بیتیش لَرینگ بیتمه یه سن دولمایانگ
چوخ کرکیجک دَه یدی سنینگ کؤکینگه
آنا دیلیم سارالمایانگ سولمایانگ

آنا دیلیم آرخا سننگ، سننگ دال
تاریمیزینگ باخیشی ینگ سننگ آلّ
آیریقسی ینگ هامی دیللَردن آیری
دانیشدیران ، آغزیمیزا سننگ بال

آنا دیلیم اؤره گیمه یار سننگ
تا دونیا وار،ازل ،ابد ، وار سننگ
او کیمسه لر کی دیلدن آتدی سنی
یاشلاری قان،گؤزلرینه خار سننگ


*فرود مرادی دره شوری*
۱۴۰۰/۱/۲۸