*دانیشاق*

گل اوتور اوزاوزه ای سویگولو جانان دانیشاق

اولموسان سن نئجه گور آفت ایمان دانیشاق

باغریمی ائیله میسن لاله کیمین قان گوزه لیم

قویما بو بولبول عشقین قالا نالان دانیشاق

نئچه ایللردی سن آیریلمیسان ای غملی نیگار

قویما سن گوزلری اولسون گئنه گیریان دانیشاق

صنما لوطف ائله بیرمجلیس مئیخانییه گل

باغلییاق بیرده تازا شدان تزه پئیمان دانیشاق

سن دئییردین گل اولاق بیربیره بیرجان ایکیمیز

بودوشن فاصیله دن هم ده زاماندان دانیشاق

خسته بولبول دولانار باغچادا هئی گول باشینا

باشینا گل دولانیم هئی من نالان دانیشاق

ناله نیفرین ائله دین ناله لرین توتدو منی

قلبیده سن یارادیبسان نئجه طوفان دانیشاق

مرحمت ائیلییه سن بوسه ویرام لبلرینه

باریشاق بیزایکیمیز گر اولاایمکان دانیشاق

بولبولوم نازلی گولوم همده باهاریم سنیدین

آچیلا لبلر اولا غنچه ی خندان دانیشاق

شانه تک هئی دولاشام منده گوزه ل تئللرینه

زولفونو ائیلیه سن گردنه افشان دانیشاق

منی بوعشقیده چکدین گوزه لیم هرطرفه

باغریمی ائیله میسن گورنئجه آل قان دانیشاق

سالدیقین درده دئدیم سن یئنه درمان ائده سن

سن دئدین ائیلییرم یوخ بئله درمان دانیشاق

قویدون عباسینی حئیران اوگوزه ل گوزلرینه

من فداگوزلرینه ای گوزو جئیران دانیشاق
_______
عبدالله عباسیان (عباسی)