....... گئورمیشم ! .......

تجربه ائدمیشم، چئوخ قیشی- یازی
چیلّه ده آچولان ؛ بادام گئورمیشم
گل تا دئیم گوزل سنه، بو رازی
چالخنان دریائیی آرام گئورمیشم
****** ****** ******ـ
دونگوزدان وحشی تر، دیرناغوم چکن
عمامه سوزینگنن ، درّریمئ سئوکن
چنگیزدن چنگیزتر ؛ هامئ قان تئوکن
هم زابولدا ، هم در ایلام گئورمیشم !
****** ****** ******ـ
چئوخ جان چکدیم تا تانودوم اووزیمئ
محرم یوخدور ، تا کئ دئیم سووزیمئ
او گوننن کئ ، سویا چکدیم گووزیمئ !
اشّکدن اشّکتر ؛ آدام گئورمیشم
****** ****** ******ـ
فلک جلاد دوغدوونگ ، بیزی داغلایان
تحجر داشونا ، ال- قیچ باغلایان
اوورگئ قان، گووزئ یاشلئ آغلایان !
باجیم- کاکام ، آنام آتام ، گئورمیشم !!
**** ****** ******ـ
شئر ایگیدلر، دیو اووینده باغوران
گئوزل گئوزلر ، گئورمزلیگدن آغوران
وارئ جلاد ، وارئ آلله چاغوران !
پیروان دین ایسلام گئورمیشم !!
******* ****** ******ـ
تاریخینگ یولوندا ، یورغا گئدمیشم
یورناغام ناخوشام چئوخ ایسّیدمیشم
شبستاندا گئوزیم ، چراغ ائدمیشم
شیطانا درس وئرن خاخام گئورمیشم !
****** ****** ******ـ
مست تیلکئ قاقلوقینگ سویونئ ایچدئ
قارقا خان شخمونیگ تخمونئ سچدئ !
شخم اه یسئ ، هئچ بیلمدئ ، نه گچدئ
علم لئ هوو چکن ، عوام گئورمیشم !!
****** ****** ******ـ
خوب چوباندور آمّا ، دووآرئ قازدور!
ماکیان اووز وارئ ، دوخسانئ بازدور!
مدرکئ اعلادا ، درک چئوخ آزدور
گئوزلریم اوتوندا ، چئوخ خام گئورمیشم !
****** ****** ******ـ
غم تورپاغئ هنیز ، باجوم اووزینده
کورناش ووران یاش آنامونگ گئوزینده
قیرخ بئش ایلدیر، نازلئ آنام سئوزنده
ببم ببم ، بالام بالام گئورمیشم !
****** ****** ******ـ
قاف داغونینگ خوب باشونا گئدمیشم
سیمرغونّان یاخچئ سئوزلر اوءدمیشم
بو تاریخئی، من جراحلوگ ائدمیشم
شیطانونّان سلطان همگام گئورمیشم !
****** ****** ******ـ
جلاد گلمیش ، امیر کبیر یئرینّه
نه قانوننّا، نه اخلاقدا ، نه دینّه
وارکس منّن ائشدسین کئ اوینّه !
گئوزی چیخمیش جوان کاکام گئورمیشم !
****** ****** ******ـ
بو تاریخدا هئچ تقدس یوخوموش
هر نه سئیرنگ ظلم و حرمان چئوخوموش
قولاقوما آکّام بئله اوخوموش
میکده ده چئوخ مئی سیز جام گئور میشم !

نقد اولاسی بو تارخده هرکس وار
همئ فیلسوف ، هم پیغمبر، هم نجار !
نقدینگ ماحصلئ اولمایاسی دار !
مرداد آئی دا، چنارا چام گئورمیشم !!
****** ****** ******ـ
باشوم نکته سنجدیر، گئوینیم هابلئ
گرچک سئوزئ دئیَر ، اوشاخ یا دلئی !
کچّل لر آدیدیر بوردا زولفعلئ !
تناقض اوءینده ، اوهام گئورمیشم !!
****** ****** ******ـ
فلک سازونی من، جنگ ناما گئوردیم
اِل ائدّیم آغاجا ، کوتومئ سیردیم
رباعئی ویل ائدّیم قوشمایا گیردیم !
اوءزیمئ بوحالدا ، خیام گئورمیشم !
****** ****** ******ـ
من گلمدیم اوءلم یا کئ اوءلدیرم
من گلمیشدیم یاشلئ گئوزئ گوءللیرم
بولبول اولام غونچادان گول اوللورام !
خلقه دوشمن، چرخ خودکام گئورمیشم
****** ******* *******ـ
دانشمایان گئوزل ، قاش- گئوز آتانّا
گئوزل گئوزئ منه بی سس ساتانّا
بیلدیم سئیرنه دئیه؛ کیرپیک یاتانّا !
هر اوّله لایق فرجام گئورمیشم
****** ****** ******ـ
گورخرئ دونیاموز ، پر قال و قیلئر
آغونّان اثر یوخ، قره سئ زیلئر
او دیلّن کئ هئچ کس بیلمئیر نه دیلّئر؟!
فرهاد دان شیرینه ، پیغام گئورمیشم !
****** ****** ******ـ
ساچّینگ کمندئنن چیخه بیلمدیم
عشقینگ حرمتینئ ایخه بیلمدیم
چلیپا زولفلارینگ سیخه بیلمدیم
عشقینگ هر آیئنی ، صیام گئورمیشم
****** ***** ******ـ
اووزینگ حیفدیر، تشبیه ائدم من آیا
رژ وورموشانگ لبلرینگه بی وایا !
عاقل آدام شکر سپمز خرمایا !
خرمائی لبلرینگ تامام گئورمیشم !!
****** ****** ******ـ
قاشینگ مست و حیران، گئوزلرینگ خمار
گیرپیکلرینگ منیم دیشیمئ سایار !
گئوزللر گئوزینده یوخدور اعتبار
زهرِ مار ائشیدن ؛ سالام گئورمیشم !!
****** ****** ******ـ
کرکدن بئی اوتورموش؛ حضرتِ فبل !
سکوت اختیار ائد ؛ ائدمه قال و قیل
گپینه قولاق آس ؛ نیتینی بیل !
محبت آدونا ، چئوخ دام گئورمیشم !
****** ****** ******ـ
آنا دیلئی منه ، دَیَرلئ گوهر
تفلیسده ایش یوخوم اولام در بدر!
هر کیم اوءز یئرینه، تخمونی سپر
قوناق واژه لرده ، زکام گئورمیشم !!
****** ****** ******ـ
هووخوران موس چکن، ال- قیچئ باغلئ
چمیسلنمگ ایشئ ؛ دارئ ایناغلئ !
کئوپگینگ همیشه ، کپگئی یاغلئ !!
بو جَوده اووزیمئ، بدنام گئورمیشم !
****** ****** ******ـ

..قوشمالار....کورش ایمانی ایمانلو....۷/ ۱۲/ ۱۴۰۱*