🌱🌱🌱((نه فایدا))🌱🌱🌱

خزان اولدو ائلینگ بئلی اه ییلدی
قشقایی نینگ حققی بئله ده ییلدی
گوی آغاجی گور نه ایلده اویانیر
قیرخ ایل گشتی ایندی تئلی آییلدی

یولوموزا یامان تیکان اکدیلر
دوروموزا چتین دیوار چکدیلر
فاییز یئلی اسدی اوزه هر یاندان
بلگیمیزی بیر جه بیر جه توکدولر

کومک اولدوک ائل بورکونو یئل قاپا
ریمیز تکین گوللو باغا یول تاپا
هئچ قومادیک باغدان قالا بیر نیشان
دوشمن دوندو یارا یئره دوز سپه

سورا دوشمن دونوب باشا توی توتدو
سیلکه لدی باشدان ایاق اوگوددو
گوزله مدیگ آلما هئیوا نار باغی
ائل باغینی ییغیب واری یئل یوتدو

ایندی توروب قوشما قوشدوگ نه فایدا
او دونیادان وویسو قویدوگ نه فایدا
چارا بولونگ بئله یامان دردلره
داش اوستونده بورکو اویدوگ نه فایدا

ایندی دونوب چوققا گئیدیگ نه فایدا
وای وای ائدیب عکسه باخدیگ نه فایدا
اویاق اولدو سیلاب، چایا قریشدی
گویه ساری توفنگ آتدیگ نه فایدا

۱۴۰۲/۰۷/۰۱ شیراز
🌱🌱 ج ر ((اویاق ))🌱🌱